សៀមរាប៖ ការប្រកួតលីគកំពូលកម្ពុជា បានឈានមកដល់ការប្រកួតសប្តាហ៍ទី៩ហើយ ដោយ ៤គូបានបញ្ចប់ការប្រកួតរួចរាល់កាលពីថ្ងៃអាទិត្យកន្លងទៅ ដោយលទ្ធផលរួមមាន បឹងកេត ២-០ កងយោធពលខេមរភូមិន្ទ, វិសាខា ៥-០ សូលទីឡូអង្គរ, ខេត្តព្រៃវែង ១-២ ព្រះខ័នរាជស្វាយរៀង និង ភ្នំពេញក្រោន ៦-០ អគ្គិសនីកម្ពុជា។
យ៉ាងណាក្តី សប្តាហ៍ទី៩នេះនៅសល់ការប្រកួតមួយគូទៀតដែលជាគូជក់ចិត្ត ពោលគឺក្រុមកំពូលតារាងអង្គរថាយហ្គើរ ត្រូវបើកទ្វារកីឡដ្ឋាន អេស អ យូ ខេត្តសៀមរាប ទទួលក្រុមមកពីរាជធានីភ្នំពេញណាហ្គាវើលដ៍ នៅរសៀលថ្ងៃអង្គារ ទី២០ ខែកក្កដានេះ វេលាម៉ោង ៣:៣០នាទីរសៀល។
មុនការប្រកួតនេះចូលមកដល់ អង្គរថាយហ្គើរ ទើបតែខកចិត្តថ្មីៗ ក្រោយបរាជ័យក្រោមថ្វីជើងក្រុមខ្លាំងវិសាខា ដោយលទ្ធផល ៣-១ កាលពីថ្ងៃព្រហស្បតិ៍កន្លងទៅ ដោយឡែក ណាហ្គាវើលដ៍ បន្តក្តីសង្ឃឹម ៣ពិន្ទុបន្តទៀត ក្រោយយកឈ្នះក្រុមម្ចាស់ផ្ទះអាស៊ីអឺរ៉ុប កាលពីថ្ងៃពុធ ទី១៤ ខែកក្កដា ពាក់កណ្តាលសប្តាហ៍នេះ។
គួរបញ្ជាក់ថា អង្គរថាយហ្គើរបច្ចុប្បន្ននេះកំពុងឈរកំពូលតារាង ក្រោយលេងបាន ៨ប្រកួត ឈ្នះ ៦ ស្មើ ១ និងចាញ់ ១ មាន ១៩ពិន្ទុក្នុងដៃ ខណៈណាហ្គាវើលដ៍ទើបលេងបាន ៧ប្រកួតប៉ុណ្ណោះ ជាមួយលទ្ធផលឈ្នះ ៤ ស្មើ ២ និងចាញ់១ មាន ១៤ពិន្ទុក្នុងដៃ។ ការប្រកួតដ៏ជក់ចិត្តនេះ ក៏មានការផ្សាយផ្ទាល់តាមរយៈកញ្ចក់ទូរទស្សន៍ BTV News និង Page ផ្លូវការ BTV Cambodia ផងដែរ៕
រូបភាព៖ គណៈកម្មការប្រកួតបាល់ទាត់ជាតិកម្ពុជា - CNCC
